Radio Frute e je une trasmission radiofoniche dedicade ai fruts e ai lôr gjenitôrs, mandade in onde di Radio Onde Furlane inte Vierte dal 2015. Un program di contis in lenghe furlane pai fruts, pai lôr gjenitôrs e pai insegnants. La trasmission e je stade pensade ancje tant che une vetrine dinamiche des produzions didatichis de ARLeF, dal materiâl metût dongje inte sezion dedicade ai fruts sul sît de Agjenzie e di altris produzions editoriâls e multimediâls pe infanzie in lenghe furlane.
La trasmission si disvilupe in trê parts principâls, tignudis adun e compagnadis des vôs di fruts bi- e plurilengâi e dal condutôr Michele Polo. Inte prime part a vegnin presentadis e letis ai fruts lis flabis par favorî la dimension sonore de lenghe e dal mieç radiofonic.
Inte seconde part al ven dât spazi aes intervistis e aes testemoneancis di gjenitôrs che a àn fat une sielte di bi- o plurilinguisim, o che a àn rifletût e si son confrontâts su lis implicazions educativis di cheste sielte intun teritori plurilengâl, ma ancje di fruts che a àn comentât il lôr rapuart cu la lenghe furlane intai diviers contescj dal cuotidian.
Inte tierce part la peraule e passe ai esperts. Tacant dal progjet promovût de ARLeF par sostignî il plurilinguisim precoç “Crescere con più lingue/Cressi cun plui lenghis“, si son aprofondidis lis variis tematichis midiant dai contribûts di Alessandra Burelli, Susanna Pertot, Patrizia Pavatti, Franco Fabbro, Silvana Schiavi Fachin, dai intervents e dai materiâi di esperts internazionâi, tant che Antonella Sorace de Universitât di Edimburc (UK).
Radio Frute e je lade in onde tra Avrîl Jugn dal 2015, ogni setemane, par un totâl di 20 pontadis di 20 minûts ognidune.
DETAIS:
Ideât e fat di: Michele Polo
Produzion: Informazione Friulana soc. coop. Cu la partecipazion in studi di: Matilde Fadi e Matteo Colomba Finanziament: ARLeF – Agjenzie Regjonâl pe Lenghe Furlane
An: 2015
Numar pontadis: 20
Durade: 20′
Imagjins
