Festival des arts in lenghe minoritarie
SUNS Europe al è il principâl festival european des arts in lenghe minoritarie: nol è dome une vetrine des miôr produzions artistichis, ma ancje une ocasion di confront e dialic tra lis minorancis.
Lis origjins dal festival
Il progjet SUNS Europe al pues calcolâsi tant che la evoluzion di SUNS, il festival de cjançon in lenghe minoritarie risiervât aes minorancis linguistichis talianis e de Europe Mediteranie (de France ae Cravuazie), nassût a Udin intal 2009.
SUNS al jentrave tra lis iniziativis sostignudis de ARLeF pe promozion de lenghe furlane intal setôr artistic e culturâl.
Il festival si è presentât daurman tant che un dai apontaments musicâi di plui grant sucès, un puint ideâl tra lis minorancis linguistichis storichis di Europe.
SUNS al è nassût tant che festival itinerant, di fat, dongje des 4 edizions che si son fatis a Udin (2008, 2009, 2012 e 2014) si son davueltis altris 4 edizions fûr regjon: intal 2011 in Svuizare, a Falera; intal 2013 in Val di Fasse, a Moena; intal 2015 in Sardegne, a Cagliari; e intal 2016 di gnûf a Moena.
SUNS al jere stât ideât come une semifinâl che e garantive ai doi vincidôrs l’acès a festivai internazionâi, tant che il Liet International prime, e SUNS Europe dopo.
Di SUNS a SUNS Europe
La prime edizion di SUNS Europe si è davuelte a Udin intal 2015. Di in chê volte il festival al è cressût di an in an, e vuê al è un lûc di incuintris e di confront des miôr produzions artistichis in lenghe minoritarie su scjale europeane. Suns duncje, ma ancje cine e tescj leteraris che a esprimin, cun visions e peraulis, identitâts esistentis e resistentis.
SUNS Europe al presente lis miôr produzions culturâls intes lenghis minoritariis de Europe, mostrant la vivarosetât e la cualitât dai prodots artistics. Al è un Festival fat di art, contaminazion, talent, pluralisim linguistic, modernitât e creativitât, che al incjarne in maniere concrete il sproc de Union Europeane “unîts inte diversitât”. Al cjape dentri centenârs di artiscj e un public internazionâl simpri plui numerôs, zovin e curiôs, che al scuvierç di condividi une identitât salde ma vierte, e la volontât di doprâ lis propriis lenghis intune otiche di scambi, creativitât e modernitât.
Al bant di SUNS Europe a rispuindin ogni an une vore di artiscj. Sielzi i finaliscj e je simpri une sfide grivie, a dimostrazion di cetant che la sene artistiche in lenghe minoritarie e sedi ative e produtive.
Sore dai apontaments musicâi, il program dal festival si inricjìs ogni an di incuintris e aprofondiments su la leterature, il cine e il teatri. L’obietîf al è chel di promovi lis miôr produzions artistichis intes lenghis minorizadis de Europe, garantint lôr visibilitât mediatiche a nivel internazionâl, ma no dome: al è un moment di dialic e di confront, un lûc dulà fâ rêt e costruî gnûfs progjets e colaborazions.
SUNS Europe al gjolt de poie de ARLeF e de Regjon Friûl-Vignesie Julie. Al è un progjet realizât des cooperativis Informazione Friulana e Puntozero e si zove de colaborazion preziose dal Comun di Udin, de Fondazione Friuli e di une lungje serie di altris sogjets publics e privâts.
SUNS Europe al ricêf ogni an il patrocini dal Consei de Europe parcè che al promôf produzions artistichis ricercjadis e origjinâls, mostrant cemût che la diversitât linguistiche in Europe, di là di jessi une ricjece culturâl e un dirit fondamentâl, e sedi ancje une risorse creative inestimabile; e ancje il patrocini di NPLD – Network to Promote Linguistic Diversity.
Par vê plui informazions visite il sît uficiâl dal festival o la pagjine Facebook di Suns Europe e ricuarde che tu puedis fâ part ancje tu de organizazion di Suns come volontari.
Consulte i materiâi
| Ogjet | Cjale |
| Cjale il video promozionâl di Suns Europe 2016 |
|
| Cjale il trailer dal documentari Suns Europe 2016 |
|
| Cjale il trailer dal documentari sul Liet International 2011 |
|
Imagjins
