Udinese Calcio

Lenghe furlane e sport, un binomi che al vinç, dal savôr european

La Agjenzie Regjonâl pe Lenghe Furlane, la societât Udinese Calcio Spa e il Comun di Udin a àn siglât intal 2015 un protocol di intese par implementâ la presince dal furlan dentri e fûr dal stadi, intes azions di comunicazion – ancje visive – de societât, di animazion pre-partide e di fidelizazion dai tifôs.

No je stade la prime volte che la ARLef si è fate promotore di un acuardi cu la scuadre locâl di massime serie par promovi l’ûs de lenghe furlane inte ativitât comunicative e sportive de societât: in principi la Societât e à sielt, fra lis primis azions di meti in cjamp, la realizazion dal sît istituzionâl ancje par furlan e, cu la colaborazion de ARLeF, la ativazion dal “live mach” scrit in timp reâl, azion par azion, in lenghe furlane pai tifôs in direte web dilunc des partidis in cjase.
Cun di plui, pe Fieste de Patrie dal Friûl, ai 3 di Avrîl dal 2010, la Societât sportive furlane e à distribuît in dut il stadi la publicazion “GOL La lenghe dal sport” curade di Federica Angeli e Priscilla De Agostini par cont de Agjenzie Regjonâl pe Lenghe Furlane sul rapuart fra lenghe, sport e identitât.

Viodût il sucès di chestis iniziativis, seguidis vie web ancje dai tancj furlans che a vivin tal forest, al è stât firmât un gnûf protocol di intese che al rapresente une azion impuartante di ricognossiment e di valorizazion de pluralitât linguistiche dal teritori, in plui che di marketing e di promozion a 360 grâts.

L’intindiment al è chel di svicinâ l’Udinese Calcio aes esperiencis za sperimentais cun sucès di diviersis realtâts di Europe – tant che il FC Barcelona, l’Athletic Circul Bilbao, il Celtic di Glasgow – che si son fatis ricognossibii e plui interessants ancje in virtût des propriis specificitâts linguistichis e culturâls. Il plan di azions previodût dal protocol, che al fasarà deventâ l’Udinese Calcio SpA “uniche” e “speciâl”, compagn dal teritori plurilengâl che e rapresente intal panorame dal balon nazionâl e european, al viôt la realizazion di cartelonistiche e segnaletiche plurilengâl (talian, furlan e inglês) interne e esterne al Stadi Friûl, l’ûs de lenghe furlane dilunc des iniziativis promozionâls, informativis e di intratigniment pre-partide e intal interval, lis comunicazions di servizi plurilengâls, la presince de lenghe furlane intai social, intal sît internet dal Udin, inte sezion dedicade ai tifôs e/o in sezions specifichis. In futûr e podarà jessi studiade ancje la pussibilitât di fâ campagnis di comunicazion e di abonament plurilengâi.

L’Udin al à rapresentât simpri pai siei tifôs, di là de passion pai siei colôrs, un pont di agregazion fuarte dal sens di identitât e apartignince. Graciis a chest progjet e ae sinergjie disvilupade dai trê sogjets coinvolts, il club plui impuartant de nestre Regjon, cognossût e preseât in dut il mont, al podarà promovi in maniere origjinâl e zovevule i siei servizis garantint il rispiet dai dirits linguistics, rinfuarçant la “fidelizazion” dai tancj tifôs in Friûl e tal forest e, plui in gjenerâl, atirant la atenzion de opinion publiche ancje a nivel talian e european. Lis lenghis e il sport a son tant impuartants pal benstâ e pe coesion sociâl e al è impuartant che la lenghe locâl e ocupi un spazi simpri plui incisîf in chest setôr.

Fra lis azions realizadis a vuê, la grafiche dai skybox cu lis scritis par talian e par furlan dal sproc storic dal Udin: “La passion e je la nestre fuarce/La passione è la nostra forza” visibii ancje des scjalinadis dai distints e des curvis; avigniments dedicâts il dì de Fieste de Patrie dal Friûl (proiezion tal megaschermi dal stadi intal prepartide, dal video musicâl “No sta a contâmi dome chê storie”) e la presince continuative di articui in lenghe furlane intal Magazine de scuadre distribuît a gratis intal stadi intes partidis in cjase.