NO STÂ A FÂTI CONTÂ LA STORIE DAL ORS:
VEN SU YOUPALTUBO!
YoupalTubo al è il canâl YouTube “made in Friûl” animât di 10 zovins youtubers e siôr di contignûts creatîfs e stimolants che a cjapin dentri fantats e fantatis furlanis, ma no dome. Cu la campagne di informazion multicanâl No stâ a fâti contâ la storie dal ors: ven su YoupalTubo!, la ARLeF e vûl incressi la popolaritât dal canâl che al à za milions di visualizazions. Ma, soredut, e smire a infuartî il so leam cu lis gnovis gjenerazions, mostrant che lis storiis e i protagoniscj dal Friûl, tant che la lenghe cu lis sôs sfumaduris e i siei significâts, a puedin jessi argoments intrigants, bogns di incuriosî i zovins e di cjapâju dentri simpri di plui.
CAMPAGNE SOCIAL
Chei di Udin, ven a stâi Mattia Cantarutti e Federico Iob, ispirâts dal Quiz Mortale, il format che ju à fats deventâ famôs, a partissin par une gnove sfide: isal cualchidun che al fevele furlan a Triest?
I protagoniscj dal video TikTok, sbarcjâts sul Molo Audace, a balinin par Place Unitât e pes viis dal centri storic par intervistâ int di ogni etât. I doi si intivin fintremai cul “coleghe” Max Sganga, un innomenât youtuber triestin.
SPOT TV
Il spot al è un concentrât di tocuts di filmâts gjavâts fûr di videos di YoupalTubo e in 30 seconts al rive a trasmeti al spetatôr la ricjece di contignûts dal canâl. Une daûr di chê altre, a passin a dute corse lis musis de plui part dai zovins protagoniscj di YPT; cul lôr snait che al fâs propit vignî voie di cori a viodi i videos tal canâl YouTube di YoupalTubo.
SPOT RADIOFONIC
Tant che il spot tv e la campagne Adv, ancje il spot radiofonic al sburte il public a esplorâ il canâl YoupalTubo. Par fâlu, lu traspuarte intun famôs quiz imagjinari. La concorinte e fale la rispueste e e piert un premi sensazionâl. Sfortunade o impreparade? Se e ves savût dal canâl – al comente cui che i sta daûr ae trasmission – e varès sigûr dât la rispueste juste!
ADV
Il protagonist de campagne stampe al è un ors pardabon fûr dal ordenari, che al à sù un pâr di scufis stereo grandis, come che e fâs la plui part dai zovins vuê, e che al è vistût in stîl rap. Il sproc No stâ a fâti contâ la storie dal ors: ven su YoupalTubo! al rimande di proposit ae innomenade detule furlane che e met in vuaite cuintri di cui che al conte fats no dal dut vêrs. YoupalTubo, invezit, al è une vere garanzie!
CREDITS
