La prove INVALSI e je une tipologjie di test che, dal 2009, e ven sometude ai arlêfs di seconde e cuinte elementâr, de tierce medie e de seconde superiôr par valutâ il grât di competence dai arlêfs des scuelis talianis.
La prove, elaborade e aministrade dal Istitût nazionâl pe valutazion dal sisteme educatîf de istruzion e de formazion, e valute in particolâr la comprension di un test e la paronance de matematiche in situazions concretis.
Tacant de prove dal an scolastic 2019/2020, ae domande “A cjase cuale lenghe fevelistu pe plui part dal timp?”, jenfri lis passe 15 lenghis a disposizion, i students a podaran rispuindi ancje “furlan”: si trate di un altri ricognossiment impuartant pe lenghe furlane, pal so status e pe nestre scuele.
