Iniziative presentade dal Cuestôr di Udin, dot.e Manuela De Bernardin Stadoan, e dal President de ARLeF, Eros Cisilino, cul intervent dal Assessôr regjonâl aes Autonomiis locâls, Pierpaolo Roberti.
Lis trufis ai anzians a causin dispès alerte sociâl, cun carateristichis simpri diferentis, che a tocjin lis personis, in particolâr chês bessolis, sedi in cjase che in ambients publics. La prevenzion, duncje, e je impuartante par che i anzians a imparin a ricognossi il pericul e a savedin cemût compuartâsi par no jessi imbroiâts.
Cun chest obietîf, la Cuesture di Udin e à ideât e realizât une impuartante campagne di prevenzion e di sensibilizazion dai citadins. Par passâ il messaç dai cuatri videos in maniere eficace e direte, e à domandât il supuart de ARLeF, che cun chê e à firmât un protocol di intese. La campagne si indrece duncje ai anzians te lôr lenghe mari, il furlan.
Cjale achì i videos de campagne
Cun cuatri spot video, la campagne informative de Polizie di Stât, cun partner il CSS Teatri Stabil di Inovazion dal Friûl-Vignesie Julie di Udin, e fronte lis situazions di imbroi e insidie plui comunis: al bancomat, a cjase, al telefon, par email. I protagoniscj a son innomenâts atôrs furlans: Caterina Tomasulo, ven a stâi Catine, e Fabiano Fantini, Claudio Moretti, Elvio Scruzzi dal Teatro Incerto. A son lôr a dâ i conseis par evitâ lis trufis, cul lôr tipic humor.
I videos – realizâts cu la regjie di Stefano Bergomas e Giorgio Milocco di Quasar – si concentrin su lis principâls modalitâts che i malvivents a doprin par imbroiâ lis personis plui debilis, in particolâr chês che a sucedin in cjase. In ducj i câs, ancje chel di un sempliç suspiet, i citadins a son invidâts a contatâ daurman la Polizie di Stât. Lu ribat in ogni video propit il Comissari Mara Lessio, de Division Anticrimin de Cuesture di Udin, che e invide a clamâ simpri il Nue (Numar Unic pes Emergjencis) 112.
La sielte di veicolâ la comunicazion par furlan, lenghe che soredut i citadins anzians a doprin ogni dì, e sigure di trasmeti il messaç in maniere clare, ju confuarte e e rinfuarce il sens di fiducie tai confronts des fuarcis dal ordin.
Si trate di une iniziative cuntun fuart valôr sociâl, a pro de sigurece dai citadins, che e vâl par dutis lis fassis di etât, parcè che e met la atenzion su moments di vite che a tocjin ducj. Lis buinis pratichis di prevenzion a àn di jentrâ te vite di ogni dì e in chest procès la lenghe furlane e je une vore utile.
Graciis a CrediFriuli.
