I apontaments de ARLeF dedicâts ae narative par fruts cu la presentazion di “Pierin Pieron e la strie Bistrie” e “La storie di Lolo il…”
La ARLeF e promôf doi progjets pai fruts in ocasion de Setemane de Culture Furlane, organizade de Societât Filologjiche Furlane, dai 6 ai 16 di Mai.
I events si puedin viodi on line sul sît de Setemane de Culture Furlane
Il prin apontament al è par martars ai 11 di Mai, aes 16.00, cu la presentazion in prime assolude di “Pierin Pieron e la strie Bistrie”, il gnûf audiolibri de golaine Flabis Rock, finanziade de Agjenzie e editade di Futura edizioni.
A partecipin al event la autore dal libri Lussia di Uanis (Lucia Pinat), cul president de ARLeF Eros Cisilino e Patrizia Geremia de cjase editore Futura edizioni. Il progjet al è caraterizât di une musiche (di Ulisse Viezzoli e Magdalena Schmied) in stât di cjapâ dentri grancj e piçui, ilustrazions e grafichis une vore origjinâls cuntun riferiment clâr ae fase storiche che o vivìn (in dutis lis pagjinis, sul fonts, al è un Arc di S. Marc – chel che al à acompagnât dut il 2020 cul hashtag #andràtuttobene).
“Pierin Pieron e la strie Bistrie” e je une storie che e fâs part dal repertori de tradizion orâl furlane (publicade ancje di Italo Calvino cul titul di “Il bambino nel sacco”, tal libri “Fiabe Italiane”). Cun cheste version, la autore Lussia di Uanis, che lu à rielaborât e interpretât in maniere gnove, e vûl trasmeti un messaç impuartant: come che il protagonist al à rivât a bati la strie, ancje nô o podìn bati il Covid-19.
Il secont apontament al è par miercus ai 12 di Mai, aes 18.00, cu la presentazion di “La storie di Lolo il…”, un classic de leterature israeliane par fruts che al conte di amicizie, fiducie e rispiet, cuntune trame semplice ma plene di impreviscj che i doi protagoniscj a frontin cun fuarce e convinzion.
Il volum, editât de cjase editore Forum, simpri cu la poie de ARLeF, al à la carateristiche di jessi stât voltât dal origjinâl ebraic par furlan, cence une version taliane. La opare e je stade voltade di Davide Turello, linguist e filolic te Universitât di Bamberg (Baviere). I personaçs, invezit, a son stâts dissegnâts di Pia Valentinis (vincidore de edizion n. 21 dal premi Andersen talian, tant che miôr ilustradore).
A presentaran il libri il president de ARLeF, Eros Cisilino, insiemi cul critic leterari Mario Turello e Gabriele Zanello, docent di leterature furlane te Universitât dal Friûl. Ancje in chest câs, il libri – destinât ai plui piçui – al sarà in stât di incuriosî ancje i plui grancj, che a podaran scuvierzi, cui lôr fruts, tantis peraulis furlanis pôc cognossudis.
