Il furlan, pe prime volte, al devente la lenghe di une des app pai messaçs plui dopradis tal mont. O fevelìn di Telegram, cun passe 400 milions di utents atîfs ogni mês e discjamade simpri di plui soredut dai professioniscj de comunicazion pes sôs carateristichis di praticitât e di riservatece. Cun di plui, lis cartelis, l’archivi cloud (cun capacitât ilimitade) e il supuart pai computers, a àn rindût Telegram il strument ideâl pal lavôr di cjase e pal studi in timps di cuarantene.
Un fenomen planetari che al à cjatât la juste sensibilitât ancje in Friûl, intune clape di volontaris apassionâts di cheste plateforme. Coordenâts di Martino Buchini, a àn cjapât contat cu la ARLeF – Agjenzie Regjonâl pe Lenghe Furlane- par vê un supuart linguistic professionâl e uficiâl, par che Telegram al rivàs a fevelâ furlan in maniere corete.
Chest al è stât pussibil parcè che il software al permet di creâ une lenghe personalizade su la plateforme uficiâl di traduzion e di condividile cun altris utents. In graciis di un lavôr lunc e atent di implementazion, in colaborazion cul personâl dal Sportel Regjonâl pe Lenghe Furlane, a son stadis voltadis (e revisionadis) par furlan lis cuasi 15.000 stringhis dai sistemis operatîfs dulà che si pues doprâ la app: Android, iOS, TDesktop, MacOs e Android X.
O vin cussì la conferme che pal furlan, compagn che par dutis chês altris lenghis dal mont, no je sierade nissune strade de comunicazion, nancje chês che a disfrutin i struments plui modernis, che a àn ancje il vantaç di jessi doprâts ogni dì di dutis lis fassis di utents e, in particolâr, dai zovins.
In spiete dal ricognossiment uficiâl de lenghe furlane di bande di Telegram che al permetarà di selezionâle tal menù des lenghis predefinidis, si pues za ativâ la interface in marilenghe clicant su chest leam: https://t.me/setlanguage/furlan-
