Al è stât il Museu di Cjase Cocel di Feagne il prin palc pe presentazion publiche de gnove serie di cartons animâts Tui e Tuie, “firmâts” ARLeF , disponibile in DVD par ducj i insegnants.
Dopo dai esperiments di alt gradiment de Pimpa e di Omenuts, seriis di cartons animâts di cualitât che a fevelavin par furlan e che a jerin dedicâts aes scuelis de infanzie, cumò al è il moment di cheste gnove serie che e ven de Russie, e che e je za stade trasmetude cun sucès di Disney Channel in Australie, in Gnove Zelande e in altris Paîs. Cumò e va in onde su Telefriuli, dentri de trasmission Maman! e tal spazi Telefruts.
Ae presentazion, di là de assessore Alessia Rosolen e dal president Eros Cisilino, a jerin presints ancje William Cisilino, diretôr de ARLeF; Renata Chiappino, dirigjente dal Istitût comprensîf di Feagne; Patrizia Pavatti, diretore dal Ufici scolastic regjonâl e Daniele Chiarvesio, Sindic di Feagne. Une cincuantine di fruts des Scuelis de infanzie di Sunviele e Madrîs e de Scuele primarie di Cicunins, cun a cjâf lis lôr insegnantis, a àn recitât e cjantât cualchi filastrocje par furlan e, cun grant divertiment, a àn assistût ae proiezion di dôs aventuris di Tui e Tuie.
La ARLeF e à fat la version in lenghe furlane dal carton animât (in colaborazion cun Belka Media – Raja Films), cumò disponibile ancje intune biele racuelte DVD cun dentri 34 episodis. Protagoniscj de animazion a son doi gjatuts blu une vore tenars, ma un pôc pastrocjons. Tui e Tuie a son fradi e sûr. Midiant di une scjate magjiche e di une imagjinazion ferbinte a vegnin traspuartâts lontan di cjase e a vivin aventuris plenis di sorpresis e di scuviertis, imparant dai compagns di viaç cualchi buine norme di vite sociâl.
Il DVD cu lis aventuris di Tui e Tuie al podarà jessi ritirât li de ARLeF, a gratis, dai insegnants e di ducj chei che a vuelin doprâlu par finalitâts ludichis e didatichis.
