Cun sabide ai 12 di Otubar dal 2019, e torne in onde la trasmission “Viaç in Friûl” curade de ARLeF, cu la colaborazion di Telefriuli.
Si trate di cinc speciâi dedicâts ae lenghe furlane, ae nestre storie e aes arts dal Friûl, cun ospits in studi, intervistis, aprofondiments e contribûts video che a permetaran al spetatôr di vivi un vêr viaç tra lis tantis carateristichis de lenghe furlane e no dome.
Cheste la programazion des pontadis, in onde su Telefriuli (canâl 11):
- Sabide ai 12 di Otubar, aes 19.30
Repliche de pontade – trasmetude ai 3 di Avrîl, in ocasion de Fieste de Patrie dal Friûl – dedicade ae storie dal Friûl e ae nassite dal stât patriarcjâl furlan. La condutore Chiara Donada e dialogarà cui ospits in studi, William Cisilino, Francesca Battistutta e Marco Torresin, par cognossi i events principâi de epoche patriarcjâl e la ereditât lassade di chel periodi storic, cul supuart ancje dai framents dal documentari “Friûl, viaç te storie” di Massimo Garlatti-Costa. Par tornâ a viodi la pontade, cliche achì. - Sabide ai 19 di Otubar, aes 21.45
Pontade dedicade al cine furlan e tal specific al film “I Dismenteâts de Transiberiane” scrit e diret de regjiste Christiane Rorato. Un film che al conte de epopee dai emigrants furlans che tra la fin dal ‘800 e il principi dal ‘900 a son partîts pe Siberie par realizâ la ferovie de Transiberiane. La condutore Chiara Donada e dialogarà cu la regjiste Christiane Rorato, za autore di lavôrs cun sogjets furlans e une vore interessade ae tiere dai siei vons furlans, Carlo Gaberscek, critic cinematografic innomenât e Livio Jacob, president de Cineteche dal Friûl e espert di storie dal cine. Daspò dal dialic in studi cui ospits, al larà in onde il film “I Dismenteâts de Transiberiane” (produzion Prelude Media). - Sabide ai 26 di Otubar, aes 21.45
Pontade dedicade al teatri in lenghe furlane e al Teatro Incerto, compagnie teatrâl che dal 1982 e puarte ator pal Friûl spetacui teatrâi par furlan. In studi a dialogaran cu la condutore Chiara Donada i atôrs Fabiano Fantini, Claudio Moretti e Elvio Scruzzi, che a contaran de lôr storie e de lôr amicizie. A insiorâ cheste pontade, la vision dal lôr spetacul “Blanc“, ispirât de comedie francese “Arte” di Yasmina Reza, là che in sene a son trê amîs che si cjatin a discuti sul acuist di un cuadri dal dut blanc. Une comedie divertente e sincire su la crisi dal nestri timp, che e vignarà presentade dal “Teatro Incerto” (produzion CSS Teatro stabile di innovazione del FVG). - Sabide ai 2 di Novembar, aes 19.30
Pontade dedicade ad implen ae lenghe furlane. La condutore Chiara Donada, insiemi cui ospits in studi William Cisilino, Francesca Battistutta e Marco Torresin, e proponarà un viaç tes origjins, tes carateristichis e te leterature cetant siore de lenghe furlane. Cun di plui, e sarà presentade la situazion des lenghis minoritariis in Europe e in Italie e il cuadri normatîf di riferiment pe lôr tutele, cuntun focus su la lenghe furlane. - Sabide ai 9 di Novembar, aes 19.30
Seconde pontade dedicade ae lenghe furlane tal ambit de educazion plurilengâl e dal insegnament a scuele, e intal mont des arts, tant che il teatri, il cine e la musiche. A dialogaran cu la condutore Chiara Donada, i ospits William Cisilino, Francesca Battistutta e Marco Torresin. A insiorâ cheste pontade lis intervistis a esperts e cognossidôrs di chescj ambits, tant che Clara Putelli, Enza Purino, Paolo Patui, Massimo Somaglino, Alessandro Di Pauli, Dorino Minigutti, Valter Colle e Doro Gjat.
