Maman!© – 01-01 – DARIO ZAMPA

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute cun tancj colôrs a son a stâ Daria e il gjatut Vigji che a passin dopomisdîs tant divertents cjantant cjançons, zuiant, contant barzaletis e leìnt storiis. A ogni pontade a tuchin te puarte ospits simpatics, ognidun cuntune storie particolâr: cjantants, scritôrs, ilustradôrs, insegnants, mâcs, cjantautôrs, atôrs, comics, musiciscj, cogos e tancj altris. A inricjî ogni apontament  a son tantis rubrichis: “A ogni frut il so librut”, dedicade ae leture di un libri ilustrât in lenghe furlane; il “Zûc”, cu lis ilustrazions di “Alc&Cè”, insert de “La Vite Catoliche”; “Master Cogo Furlan”, cu la preparazion di golosets facii di fâ; “99 peraulis”, lis cjartis ilustradis par imparâ peraulis gnovis in plui lenghis; i “Mûts di dî” e il spazi dedicât ai videos mandâts dai fruts di cjase. Ae fin, pai adults, une videointerviste curte dal progjet “Cressi cun plui lenghis” par informâ e par sensibilizâ i gjenitôrs, i nonos e i educadôrs sui vantaçs dal plurilinguisim.

In cheste pontade (1). Daria e vierç la prime pontade di Maman! contant di se e sclarint ai fruts cemût che e sarà cheste gnove trasmission che e mostrarà, in ogni pontade, personaçs, zûcs e rubrichis divertentis. E je daûr a spietâ Dario Zampa, il so prin ospit, un dai cjantautôrs storics dal Friûl cun plui di 30 agns di cariere e 150.000 discs vendûts. Dario al à fat ancje il presentadôr di diviers programs par furlan su Telefriuli, e Daria no viôt la ore di incuintrâlu. Cuant che al rive si scuse pal ritart e al conte di jessi rivât di pôc de Argjentine dulà che al è lât a cjantâ pai furlans che a son a stâ là jù. A Maman! al à puartât la sô ghitare e, stant che si svicinin lis fiestis, lui e Daria a cjantin insiemi la cjançon dal Nadâl. Dopo vê fat il zûc di Alc&Cè, imparât cualchi gnove peraule cun “99 Peraulis”, insegnât un gnûf mût di dî e cjalât cun plasê i videos mandâts di cjase dai telespetatôrs di Maman!, Daria si rilasse tal tinel cun Vigji, il so gjatut, e i conte lis aventuris de zornade. In sieradure, pai gjenitôrs, e va in onde une videointerviste curte a Antonella Sorace: “Cuâi sono i vantaçs principâi dal bilinguisim precoç?”

Condutore e autore: Daria Miani
Regjie: Luca Fornasiero
Musiche: Flaviano Miani
Redazion e consulence linguistiche ARLeF: Priscilla De Agostini, Linda Picco, Miriam Pupini
Responsabil dal progjet pe ARLeF: William Cisilino
Coordenament pe ARLeF: Priscilla De Agostini
Sigle Maman!: vôs e peraulis di Daria Miani, musiche di Flaviano Miani, foto di Silvia Raber, animazion di Pierangelo Buttazzoni e Davide Nicolicchia
Logo Maman!: Calt Udin
Durade: 20 minûts cirche

Contats:
arlef@regione.fvg.it
maman@tvstar.com