Maman!© – 02-16 – LIS BESTIIS

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute plene di colôrs a vivin Daria e il gjatut Vigji. Ogni dì e ven a cjatâju la lôr amie Chiara e ancje Siôr Timp, un personaç une vore stravagant: insiemi a passin dopodimisdîs une vore divertents là che a cjantin, a zuin, a contin barzaletis e a lein contis.

In cheste pontade: Lis bestiis (16). Siôr Timp al è daûr a clamâ ducj i siei amîs animaluts: la gjaline, il mus, il crot, il gjat Vigji e… e mancje jê, la copasse! Ve l’induvinel de pontade, e vie cu la formule magjiche! Daria e fâs lis provis cu lis mans par fâ lis ombris cinesis e i insegne a Chiara cemût fâ. Cussì e conte cu lis mans la storie “Il cjan che al voleve studiâ lis lenghis”: un cjan al zirave il mont par cognossi ducj i animâi de tiere e par imparâ i lôr viers e lis lôr lenghis, o ben il vuacâ, il bebeâ, il sgnaulâ. Par chest, al è stât nomenât professôr di lenghis de Universitât di Cjanopoli. Chiara e Daria a intonin la cjançon “Lis bestiis” e ae fin Daria cun Vigji e comente la biele zornade.

Condutoris e autoris: Daria Miani e Chiara Donada
Cu la partecipazion di: Manuel Buttus
Responsabil di produzion pe ARLeF: William Cisilino
Coordenament gjenerâl: Vittorio Vella (Deltastudios)
Regjie: Luca Fornasiero
Musichis origjinâls: Flaviano Miani (musiche), Daria Miani (peraulis)
Animazion sigle: Pierangelo Buttazzoni e Davide Nicolicchia
Consulence linguistiche e otimizazion: Linda Picco e Elena Zanussi (Calt sas)
Durade: 20 minûts cirche

Contats:
arlef@regione.fvg.it
maman@tvstar.com