Maman!© – 01-22 – CHIARA DONADA

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute cun tancj colôrs a son a stâ Daria e il gjatut Vigji che a passin dopomisdîs tant divertents cjantant cjançons, zuiant, contant barzaletis e leìnt storiis. A ogni pontade a tuchin te puarte ospits simpatics, ognidun cuntune storie particolâr: cjantants, scritôrs, ilustradôrs, insegnants, mâcs, cjantautôrs, atôrs, comics, musiciscj, cogos e tancj altris. A inricjî ogni apontament  a son tantis rubrichis: “A ogni frut il so librut”, dedicade ae leture di un libri ilustrât in lenghe furlane; il “Zûc”, cu lis ilustrazions di “Alc&Cè”, insert de “La Vite Catoliche”; “Master Cogo Furlan”, cu la preparazion di golosets facii di fâ; “99 Peraulis”, lis cjartis ilustradis par imparâ peraulis gnovis in plui lenghis; i “Mûts di dî” e il spazi dedicât ai videos mandâts dai fruts di cjase. Ae fin, pai adults, une videointerviste curte dal progjet “Cressi cun plui lenghis” par informâ e par sensibilizâ i gjenitôrs, i nonos e i educadôrs sui vantaçs dal plurilinguisim.

In cheste pontade (22). Daria e je a cjase che e cjale la television. E varès di fâ i compits ma no à nissune voie e e cîr in ducj i mûts di rimandâ i siei dovês: si imbelete, e fâs mirinde, e cjante, e starnude e e polse intal zardin. Chiara Donada e ven a cjatâle: jê e je une atore di teatri, e insegne e e cjante intal grup “Iatitaia blues band”. Chiara e cîr di convinci Daria a fâ i compits e, di chê strade, e fâs lis puliziis e e ricuarde ae amie mûts di dî che a son pardabon insegnaments di vite. Dopo vê fat il zûc di Alc&Cè, cjalât il carton animât “La âf blu”, imparade cualchi gnove peraule cun “99 Peraulis”, insegnade la ricete dai cjocolatins inte rubriche di Master Cogo Furlan e un gnûf mût di dî, e dopo vê cjalât cun plasê i videos mandâts di cjase dai telespetatôrs di Maman!, Daria si rilasse intal tinel cun Vigji, il so gjatut, e i conte lis aventuris de zornade. In sieradure, pai gjenitôrs, e va in onde une videointerviste curte a Linda Picco: “Fevelâ a sô fie par furlan aial creât creât criticitâts a nivel sociâl?”.

Condutore e autore: Daria Miani
Regjie: Luca Fornasiero
Musiche: Flaviano Miani
Redazion e consulence linguistiche ARLeF: Priscilla De Agostini, Linda Picco, Miriam Pupini
Responsabil dal progjet pe ARLeF: William Cisilino
Coordenament pe ARLeF: Priscilla De Agostini
Sigle Maman!: vôs e peraulis di Daria Miani, musiche di Flaviano Miani, foto di Silvia Raber, animazion di Pierangelo Buttazzoni e Davide Nicolicchia
Logo Maman!: Calt Udin
Durade: 20 minûts cirche

Contats:
arlef@regione.fvg.it
maman@tvstar.com