Maman!© – 01-04 – SERENA MARTINI

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute cun tancj colôrs a son a stâ Daria e il gjatut Vigji che a passin dopomisdîs tant divertents cjantant cjançons, zuiant, contant barzaletis e leìnt storiis. A ogni pontade a tuchin te puarte ospits simpatics, ognidun cuntune storie particolâr: cjantants, scritôrs, ilustradôrs, insegnants, mâcs, cjantautôrs, atôrs, comics, musiciscj, cogos e tancj altris. A inricjî ogni apontament a son tantis rubrichis: “A ogni frut il so librut”, dedicade ae leture di un libri ilustrât in lenghe furlane; il “Zûc”, cu lis ilustrazions di “Alc&Cè”, insert de “La Vite Catoliche”; “Master Cogo Furlan”, cu la preparazion di golosets facii di fâ; “99 peraulis”, lis cjartis ilustradis par imparâ peraulis gnovis in plui lenghis; i “Mûts di dî” e il spazi dedicât ai videos mandâts dai fruts di cjase. Ae fin, pai adults, une videointerviste curte dal progjet “Cressi cun plui lenghis” par informâ e par sensibilizâ i gjenitôrs, i nonos e i educadôrs sui vantaçs dal plurilinguisim.

In cheste pontade (4). A cjase di Daria e rive Serena Martini, une insegnante de scuele pe infanzie che e scomence a contâ la storie dal “Miluç de magne”, un miluç magjic che al à il desideri di viazâ e di scuvierzi il mont, dome che nol rive a svolâ. Daria e cîr di judâle cuntun truc, ancorantle a un balonut. Serena e Daria a costruissin une ruie simpatiche cui grans di ue, e dopo a scomencin a lei il libri “Un miluç ae scuvierte dal mont”. Saludade la ospite, Daria e fâs il zûc di Alc&Cè, e insegne cualchi gnove peraule cun “99 Peraulis” e un gnûf mût di dî, si gjolt i videos mandâts di cjase dai telespetatôrs di Maman!, e infin si rilasse intal tinel cul so gjatut Vigji contantji lis aventuris de zornade. In sieradure, pai gjenitôrs, e va in onde une videointerviste a Antonella Sorace: “I studis sientifics sul bilinguisim e la osservazion direte dai fruts bilengâi ce àno dimostrât?”

Condutore e autore: Daria Miani
Regjie: Luca Fornasiero
Musiche: Flaviano Miani
Redazion e consulence linguistiche ARLeF: Priscilla De Agostini, Linda Picco, Miriam Pupini
Responsabil dal progjet pe ARLeF: William Cisilino
Coordenament pe ARLeF: Priscilla De Agostini
Sigle Maman!: vôs e peraulis di Daria Miani, musiche di Flaviano Miani, foto di Silvia Raber, animazion di Pierangelo Buttazzoni e Davide Nicolicchia
Logo Maman!: Calt Udin
Durade: 20 minûts cirche

Contats:
arlef@regione.fvg.it
maman@tvstar.com