Maman!© – 01-08 – DANILO TONEATTO

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute cun tancj colôrs a son a stâ Daria e il gjatut Vigji che a passin dopomisdîs tant divertents cjantant cjançons, zuiant, contant barzaletis e leìnt storiis. A ogni pontade a tuchin te puarte ospits simpatics, ognidun cuntune storie particolâr: cjantants, scritôrs, ilustradôrs, insegnants, mâcs, cjantautôrs, atôrs, comics, musiciscj, cogos e tancj altris. A inricjî ogni apontament a son tantis rubrichis: “A ogni frut il so librut”, dedicade ae leture di un libri ilustrât in lenghe furlane; il “Zûc”, cu lis ilustrazions di “Alc&Cè”, insert de “La Vite Catoliche”; “Master Cogo Furlan”, cu la preparazion di golosets facii di fâ; “99 peraulis”, lis cjartis ilustradis par imparâ peraulis gnovis in plui lenghis; i “Mûts di dî” e il spazi dedicât ai videos mandâts dai fruts di cjase. Ae fin, pai adults, une videointerviste curte dal progjet “Cressi cun plui lenghis” par informâ e par sensibilizâ i gjenitôrs, i nonos e i educadôrs sui vantaçs dal plurilinguisim.

In cheste pontade (8). Danilo Toneatto al va a cjatâ Daria par fâi cognossi Facanapa, la mascare di carnevâl: lui al ame costruî buratins, scrivi storiis e contâlis. Facanapa e je une mascare inventade intal 1700 di un ciert Antoni Recondini, ispirade ae figure di un farmacist di S. Denêl cul nâs un pôc fracât, che al saveve conseâ rimiedis par ogni malan. Facanapa al è un personaç simpatic, di spirt e gjenerôs. Dopo vê fat il zûc di Alc&Cè, imparât cualchi gnove peraule cun “99 Peraulis”, let la storie di “La vecjute di Peonis” (In Olmis, di Danilo Toneatto e Marzia Moretti), insegnât un gnûf mût di dî e cjalât cun plasê i videos mandâts di cjase dai telespetatôrs di Maman!, Daria si rilasse intal tinel cun Vigji il so gjatut e i conte lis aventuris de zornade. In sierade, pai gjenitôrs, e va in onde une videointerviste curte a Antonella Sorace “Ise une etât juste par cressi bilengâi?”.

Condutore e autore: Daria Miani
Regjie: Luca Fornasiero
Musiche: Flaviano Miani
Redazion e consulence linguistiche ARLeF: Priscilla De Agostini, Linda Picco, Miriam Pupini
Responsabil dal progjet pe ARLeF: William Cisilino
Coordenament pe ARLeF: Priscilla De Agostini
Sigle Maman!: vôs e peraulis di Daria Miani, musiche di Flaviano Miani, foto di Silvia Raber, animazion di Pierangelo Buttazzoni e Davide Nicolicchia
Logo Maman!: Calt Udin
Durade: 20 minûts cirche

Contats:
arlef@regione.fvg.it
maman@tvstar.com