Maman!© – 01-09 – GIANNI STELITANO

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute cun tancj colôrs a son a stâ Daria e il gjatut Vigji che a passin dopomisdîs tant divertents cjantant cjançons, zuiant, contant barzaletis e leìnt storiis. A ogni pontade a tuchin te puarte ospits simpatics, ognidun cuntune storie particolâr: cjantants, scritôrs, ilustradôrs, insegnants, mâcs, cjantautôrs, atôrs, comics, musiciscj, cogos e tancj altris. A inricjî ogni apontament a son tantis rubrichis: “A ogni frut il so librut”, dedicade ae leture di un libri ilustrât in lenghe furlane; il “Zûc”, cu lis ilustrazions di “Alc&Cè”, insert de “La Vite Catoliche”; “Master Cogo Furlan”, cu la preparazion di golosets facii di fâ; “99 Peraulis”, lis cjartis ilustradis par imparâ peraulis gnovis in plui lenghis; i “Mûts di dî” e il spazi dedicât ai videos mandâts dai fruts di cjase. Ae fin, pai adults, une videointerviste curte dal progjet “Cressi cun plui lenghis” par informâ e par sensibilizâ i gjenitôrs, i nonos e i educadôrs sui vantaçs dal plurilinguisim.

In cheste pontade (9). Al è carnevâl e “ogni scherç al vâl”… Daria e je a cjase ma i sucedin pardabon robis straniis… Zuan di Gjidio (Gianni Stelitano) vistît di SuperFurlan, al sa che Daria e à la fobie dai ragns e, intant che jê e passe il dopomisdì cun Zoe e Nêf, lui, ben platât, le tormente cun ragns pustiçs e scherçs di ogni gjenar. Zoe e Nêf però i insegnin a Daria che ancje i ragns a son nestris amîs e no si à di vê pôre di lôr. Dopo vê fat il zûc di Alc&Cè, imparât cualchi gnove peraule cun “99 Peraulis”, let “I animats” (di Gianni Stelitano) e “Vive lis fritulis” (in “Armeline”, di Francesca Gregoricchio, Comun di Glemone, 2013), Daria si rilasse intal tinel cun Vigji il so gjatut e i conte lis aventuris de zornade. In sieradure, pai gjenitôrs, e va in onde une videointerviste curte a Antonella Sorace “Lis diviersis variantis dal furlan feveladis intes fameis puedino rapresentâ un ostacul pal aprendiment dal furlan a scuele?”

Condutore e autore: Daria Miani
Regjie: Luca Fornasiero
Musiche: Flaviano Miani
Redazion e consulence linguistiche ARLeF: Priscilla De Agostini, Linda Picco, Miriam Pupini
Responsabil dal progjet pe ARLeF: William Cisilino
Coordenament pe ARLeF: Priscilla De Agostini
Sigle Maman!: vôs e peraulis di Daria Miani, musiche di Flaviano Miani, foto di Silvia Raber, animazion di Pierangelo Buttazzoni e Davide Nicolicchia
Logo Maman!: Calt Udin
Durade: 20 minûts cirche

Contats:
arlef@regione.fvg.it
maman@tvstar.com