La presentazion martars ai 11 di Jugn, a San Vît dal Tiliment.
Inte suaze di “Incuintri cu la poesie furlane”, la ARLeF e il comun di San Vît dal Tiliment a presentin il volum “Vous dal grumal di aria” di Giacomo Vit, une antologjie di 40 agns di poesiis in lenghe furlane.
L’apontament al è par martars ai 11 di Jugn aes 20.30 li de Biblioteche Civiche di San Vît dal Tiliment, in vie P. Amalteo, 41.
A saran presints par puartâ il lôr salût il President de ARLeF, Eros Cisilino e il Sindic di San Vît dal Tiliment, Antonio Di Bisceglie. Al dialogarà cul autôr il poete Marco Marangoni.
La antologjie “Vous dal grumal di aria” e cjape dentri 40 agns di impegn poetic. L’imagjinari de poesie par furlan di Vit si ispire al mont naturalistic de sô tiere, fate di planuris e di tante aghe (riui, sfueis, flums), e partant ancje a ce che al è leât a chest mont. Plantis e animâi a son pensâts però intune clâf simboliche: l’aspiet naturalistic al è dome un pont di partence che al ven superât dal autôr cu la poesie. Par Vit la poesie no à di jessi fûr de realtât, ma in cualchi maniere e à di puartânt “il pês”. In chest sens, une part de sô produzion e je stade indreçade ae denunzie dai mâi de societât.
Giacomo Vit al è nassût a San Vît dal Tiliment
tal 1952 e al vîf a Bagnarole. Al è autôr di oparis par furlan di narative
e di poesie, che i àn fat vinci diviers premis nazionâi, ultin di chescj,
propit cun cheste opare, il prestigjôs
premi “Biagio Marin” tal 2018.
Al scrîf in lenghe furlane te variante di Bagnarole, in
provincie di Pordenon, doprade di pôc plui di doi mil personis.
