Lis iniziativis de ARLeF a Friuli Doc 2023
Lenghe furlane, gjenerazions zovinis, mont dai social. Chest al è il focus dal program de ARLeF– Agjenzie regjonâl pe lenghe furlane par Friuli Doc 2023.
Lis iniziativis proponudis de Agjenzie, che e ponte simpri di plui sul avignî de lenghe furlane cun progjets indreçâts ai fruts e ai zovins, soredut midiant des gnovis tecnologjiis, a son dôs.
Il spazi “Aperitivo Io sono Friuli Venezia Giulia” in Zardin Grant, al darà acet al dopli apontament di domenie ai 10 di Setembar, in graciis de colaborazion salde cun PromoTurismoFVG.
Ancje tal cûr di Udin, in place San Jacum, dulà che al è il marcjât des ecelencis cui prodots gastronomics e artesanâi “Io sono Friuli Venezia Giulia”, al è l’Infopoint PromoTurismoFVG. Achì il public al podarà ricevi a gratis materiâi informatîfs e gadgets in lenghe furlane.
Il secont apontament di domenie cu la lenghe furlane al è pes 16.00 cun YOUTUBER E TIKTOKER FURLANS.
Spazi ae gjenerazion Z (ma no dome) cul event “YoupalTubo e Tic e Tac furlan”.
Si fevelarà dai canâi YouTube e TikTok made in Friûl, tabaiant cui zovins youtubers di YoupalTubo (Lucia Bello, Federico Benedet, Davide Buccheri, Mattia Cantarutti, Desiree Chiappo, Francesco Colombino, Nicolas Fonzar, Federico Iob, Diego Scarsini, Fabio Valvason) e la tiktoker Greta
Fabbro.
A contaran cemût che e je nassude la lôr aventure digjitâl par furlan e ce che al sucêt daûr des cuintis. Cun di plui, a fasaran viodi i videos che ju àn fats cognossi e a rispuindaran aes curiositâts dal public.
Cun 54 videos publicâts, 3 milions di interazions, plui di 1 milion di visualizazions e 11 mil iscrits, YoupalTubo, il canâl YouTube promovût de Arlef, al va indevant a cressi cence padin e i siei protagoniscj a son simpri plui cognossûts, sedi su la rêt che fûr.
Nol è di mancul Tic e Tac Furlan, li che Greta e la sô gjate brasiliane Preta a proponin al public di TikTok induvinei linguistics, curiositâts, gramatiche in pirulis, tante simpatie e plui di cualchi efiet speciâl. Vuê il canâl, cun plui di 80 clips publicadis, al à passât i 14 mil followers, al à plui di 133 mil “mi plâs” e al à passe 13 milions di visualizazions.
