Ai 21 di Fevrâr si celebre la Zornade Internazionâl de Lenghe Mari istituide de UNESCO tal 1999 par tutelâ il valôr de lenghe mari e promovi la diversitât linguistiche e culturâl.
La ARLeF e celebre cheste zornade zontantsi a doi apontaments impuartants: un di chenti e un altri a nivel internazionâl.
Il prin al è il progjet “Vôs di Mammalingua“, il gnûf program radio dal progjet “Mammalingua”, dal Comun di S. Vît dal Tiliment cu la sô Biblioteche pai zovins in colaborazion cun Radio LeggiAMO, che al cjape sù leturis in lenghe, testemoneancis e intervistis: vuê o cjatais online la prime pontade!
“Mammmalingua” al è un progjet che al favorìs la integrazion e il disvilup de identitât tai plui piçui midiant des lenghis. Une ocasion in plui par capî che dutis lis lenghis a son preziosis e a van trasmetudis ai fruts cence pôre!
Il progjet al va inedenant cuntun apontament mensîl dal vîf, te Biblioteche pai Zovins di S. Vît dal Tiliment, fin al mês di Mai cun leturis par fruts in etât prescolâr par furlan, todesc, talian, inglês e tantis altris lenghis. Par dutis lis informazions, discjame la locandine ca sot.
Lis celebrazions di cheste zornade e dai siei valôrs a van indenant cui amîs di dute Europe dal Network to Promote Linguistic Diversity.
Ancje la lenghe furlane si zonte a dutis lis vôs des lenghis minoritariis in Europe par passâ il messaç che bisugne amâ la proprie lenghe e la diversitât linguistiche.
Chest, duncje, al è il video realizât dal NPLD dulà che ogni minorance e fâs sintî une detule te sô lenghe mari, tant che simbul di “protezion e conservazion des lenghis dopradis di ducj i popui dal mont“.
Ancje chest an, la lenghe furlane no podeve mancjâ a chest preziôs apontament!
Consulte i materiâi
| Ogjet | Cjale |
| "Mammalingua" program 2022 |
|
