Ancje la ARLeF in place par sostignî la culture dal zûc
Sabide ai 25 di Mai des 4 aes 8 dopomisdì la Citât di Udin si jemple di zûcs e di ativitâts ludichis e sportivis par ducj i guscj e dutis lis etâts, par ricuardâ che zuiâ al fâs ben di tancj ponts di viste.
Ancje la Agjenzie Regjonâl pe Lenghe Furlane e sarà presinte pe prime volte, sot de Loze dal Lionel, presentant zûcs e leturis par fruts, fûr par fûr par furlan.
Il zûc al jude il svilup afetîf, cognitîf e sociâl dai fruts, ma ancje dai grancj. Il frut tal zûc al impare a jessi creatîf, a sperimentâ lis capacitâts cognitivis, a scuvierzi se stes, al jentre in relazion cun chei altris e duncje al svilupe a plen la sô personalitat. Cun di plui, il zûc al favorìs l’aprendiment des lenghis, come il furlan.
Sot de Loze dal Lionel i fruts, in graciis ancje de colaborazion de cjase Editore Kappa Vu, a podaran zuiâ cul Memory di Gjat Ut, il simpatic e innomenât personaç dai libris ilustrâts di Doriana Alessio e Deborah Crapiz, cul Zûc de Ocje par furlan, realizât di Otto D’Angelo e Marina Distefano pal Istitût Ladin Furlan e cul Memory dai Mostriçs e Mostris di Maddalena Bathish e Francesca Gregoricchio, fat di schedis e di un librut cu la storie di ogni personaç.
Chest ultin memory, jessût di pôc, al fasarà zuiâ i fruts cun 23 Mostris intîrs e a tocs, ancje cuntune ponte di pôre e cualchi sgrisul, massime cuant che a varan a ce fâ cul Mostri disot dal liet, o chel dai armârs o il Mostri des scarpis puçonis: chei, no perdonin!
Intant dai zûcs si fasaran ancje leturis, zûcs cui animâi e a saran in mostre ducj i materiâi plui resints de gnove editorie par fruts in lenghe furlane e di Maman! Cun di plui, tancj materiâi promozionâi e informatîfs, ancje sui vantaçs de educazion plurilengâl a disposizion des fameis e gadget pai frutins che a zuiaran cu la Agjenzie Regjonâl pe Lenghe Furlane!
