Aministrazion Trasparente

Acès civic gjeneralizât a altris dâts e documents a pet di chei ogjet di publicazion obligatorie

L'acès civic gjeneralizât al è il dirit di cualsisedi a acedi ai dâts e ai documents de Agjenzie, altris a pet di chei ogjet di publicazion obligatorie daûr dal decret legjislatîf n. 33/2013. Chest dirit al rispuint a un principi gjenerâl di trasparence e al è ricognossût cun chê di favorî formis difondudis di control sul davuelziment des funzions istituzionâls e sul ûs des risorsis publichis, e di promovi la partecipazion al dibatiment public.

 
Al è un dirit no condizionât de titularitât di situazions rilevantis dal pont di viste juridic, e duncje al è ativabil di cualsisedi. Cun di plui, la istance di acès civic gjeneralizât no domande nissune motivazion. Cheste tipologjie di acès si esercite intal rispiet dai limits su la tutele dai interès publics e privâts.
Intai câs di dinei totâl o parziâl dal acès o che no vegni dade rispueste dentri dal tiermin di trente dîs de presentazion de istance, cui che al fâs domande al pues presentâ domande di riesam al Responsabil de prevenzion de coruzion e de trasparence.
Cuintri de decision de Agjenzie o, in câs di domande di riesam, cuintri chê dal Responsabil de prevenzion de coruzion e de trasparence, cui che al fâs domande al pues proponi ricors al Tribunâl aministratîf regjonâl su la fonde dal art. 116 dal Codiç dal procès aministratîf (Decret legjislatîf dai 2 di Lui dal 2010, n. 104).

La istance e à di identificâ i dâts, i documents o lis informazions domandadis, in possès de Agjenzie.
E pues jessi mandade:
- midiant pueste eletroniche certificade ae direzion arlef@certgov.fvg.it
- midiant pueste eletroniche ae direzion di pueste eletroniche arlef@regione.fvg.it
- midiant pueste ordenarie ae direzion dal Responsabil de trasparence, vie della Prefettura, 13 Udin
- in maniere direte, tai Uficis de ARLeF, in vie della Prefettura, 13 Udin

 
Al è ben evidenziâ che l'acès civic gjeneralizât si diferenzie di chel sempliç, stant che nol rivuarde dâts, documents o informazions ogjet di publicazion obligatorie.
Si diferenzie ancje dal dirit di acès ai ats, regolât dal articul 22 de leç ai 7 di Avost dal 1990, n. 241, par vie che chest ultin al è un strument finalizât a protezi interès juridics particolârs di bande di sogjets che a son puartadôrs di un interès diret, concret e atuâl, corispondent a une situazion tutelade par leç e colegade al document che al è domandât l'acès.
Il dirit di acès civic gjeneralizât, invezit, nol presupon un interès cualificât dal sogjet che al fâs domande e al consist intal domandâ e otignî a gratis che lis aministrazions a furnissin i ats, i documents e lis informazions di chestis possedudis.