Acès civic sempliç a dâts, documents e informazions di publicazion obligatorie
Inte ipotesi di mancjade publicazion di un at, di un document o di une altre informazion che e à di jessi publicade daûr de normative in vore, i citadins a puedin esercitâ il dirit di acès civic su la fonde dal articul 5 dal decret legjislatîf dai 14 di Març dal 2013, n. 33.
Il dirit al ven esercitât midiant de domande dai documents no publicâts.
La Agjenzie, dentri di trente dîs, e à di publicâ tal sît web il dât domandât e, intal stes timp, e à di mandâlu a cui che al fâs domande; in alternative, e pues comunicâ al interessât di vê fate la publicazion e segnalâi il colegament ipertestuâl a ce che al è stât domandât. Se invezit il document, la informazion o il dât domandât a son za publicâts daûr de normative in vore, la ARLeF e specifiche a cui che al fâs domande il colegament ipertestuâl relatîf.
La domande di acès civic e je ricognossude a cualsisedi, e je gratuite, no à di jessi motivade, e e à di jessi presentade al Responsabil de trasparence che si pronunzie su di chê.
Il Responsabil de trasparence pe ARLeF al è il dotôr William Cisilino, nomenât Responsabil de trasparence e de prevenzion de coruzion cun delibare dal Consei di Aministrazion n. 5 dai 10/02/2014 (tel. 0432-555805, e-mail william.cisilino@regione.fvg.it).
In câs di intart o di mancjance di rispueste de bande dal Responsabil de trasparence, cui che al fâs domande, daûr dal come 4 dal art. 5 dal citât decret legjislatîf 33/2013 e des modifichis e integrazions sucessivis, al pues ricori al President de ARLeF, Eros Cisilino, titulâr dal podê sostitutîf (tel. 0432-555789, pueste eletroniche presidente.arlef@regione.fvg.it).
Al è ben evidenziâ che l'acès civic sempliç si diferenzie di chel gjeneralizât stant che al inten dâts, documents e informazions che a àn di jessi publicâts in maniere obligatorie. Si diferenzie ancje dal dirit di acès ai ats – viôt l’articul 22 de leç ai 7 di Avost dal 1990, n. 241 -, par vie che chest ultin al è un strument finalizât a protezi interès juridics particolârs di bande di sogjets che a son puartadôrs di un interès diret, concret e atuâl, corispondent a une situazion tutelade de leç e colegade al document che si domande l'acès, e si esercite cu la vision o cu la estrazion di copie di documents aministratîfs.
Il dirit di acès civic sempliç, invezit, nol presupon un interès cualificât dal sogjet che al fâs domande e al consist intal domandâ e intal otignî a gratis che lis aministrazions a furnissin e che a publichin i ats, i documents e lis informazions che a possedin, che par chei e je previodude la publicazion obligatorie, ma che, par cualsisedi motîf, no sedin stâts publicâts sui propris sîts istituzionâi.
Modalitât di esercizi dal dirit di acès civic
La domande e pues jessi presentade:
- midiant pueste eletroniche certificade ae direzion arlef@certgov.fvg.it
- midiant pueste eletroniche ae direzion di pueste eletroniche arlef@regione.fvg.it
- midiant pueste ordenarie ae direzion dal Responsabil de trasparence, vie della Prefettura, 13 Udin
- in maniere direte, tai Uficis de ARLeF, in vie della Prefettura, 13 Udin
