La serie televisive su sports estremis e turisim alternatîf che e propon al public un viaç apassionant tra lis dissiplinis sportivis plui origjinâls praticadis in Friûl
+sKlet/XtremeTV e je une serie televisive, in 5 pontadis di 18 minûts ognidune, prodote intal 2015 di Informazione Friulana cu la poie de ARLeF (Agjenzie Regionâl pe Lenghe Furlane) e mandade in onde de RAI Friûl – Vignesie Julie. E ufrìs al public une escursion fra lis ativitâts sportivis plui origjinâls che si fasin in ambits naturalistics particolârs dal Friûl. Des pichis de Cjargne ae lagune di Grau e Maran, une ocasion par scuvierzi un microcosmi inspietât e sorprendent, fat di personis, lûcs e carateristichis che a rindin speciâl cheste regjon. Une produzion a cost bas, cun risultâts emozionâi e promozionâi cetant interessants.
Lis ativitâts sportivis a son stadis sieltis pe lôr “spetacolaritât” e “particolaritât”, pal bas impat ambientâl e pe facilitât di svicinament di bande di un public no specialistic. Graciis ae disponibilitât dai istrutôrs des associazions coinvoltis e aes tecnichis di riprese particolârs, fatis cun action camera che i sportîfs a vevin intor, si è cirût di fâ sintî al public lis emozions e lis pôris provadis sul cjamp dai doi zovins presentadôrs (Francesca Battistutta e Cristian Pressacco), ae lôr prime esperience sedi inte conduzion televisive che inte pratiche des variis dissiplinis.
La specialitât di chescj sports e je chê di permeti ai partecipants une imersion complete inte nature, esplorant lûcs se di no inacessibii, cul canyoning (la calade in forans e salts di aghe), il downhill (frontâ in bici i trois di mont), il kayak di mâr, il kite-surf (la vele dal parecleve su la bree di surf) e il paramotôr, (la vele dal parecleve insiemi a un motôr individuâl cu la eliche).
La lenghe furlane e je stade veicolade in dutis lis componentis de produzion: dai dialics, ae grafiche, aes musichis, il so ûs al è stât adat intal ambit inedit di une serie televisive cun carateristichis, contescj e modalitâts une vore stimolants in tiermins di spetacolaritât e impersonazion, une lenghe buine di trasmeti benon la relazion speciâl di condivision e rapresentance fra abitants e teritori.
Ogni pontade si siere cu la presentazion di un ambit particolâr di ospitalitât turistiche. Par chest, a son stâts sielts lûcs cetant impegnâts te valorizazion de produzion locâl, in sintonie cu lis esperiencis e la culture de aree di apartignince.
Tecnichis di narazion e montaç a son stâts fats cuntune cure particolâr, cussì come la grafiche e lis animazions digjitâls, creadis di pueste par meti in evidence lis cualitâts di une trasmission destinade a un public eterogjeni.
Cjale lis pontadis:
CANYONING – prime part – seconde part
KITE SURF – prime part – seconde part
DOWNHILL – prime part – seconde part
KAYAK – prime part – seconde part
PARAMOTÔR – prime part – seconde part
Detais
Regjie: Giorgio Cantoni
Produzion: Informazione Friulana soc. coop. cu la poie de ARLeF – Agjenzie Regjonâl pe Lenghe Furlane
Diretôr di produzion: Paolo Cantarutti
Coordenadore di edizion: Federica Vincenti
Presentadôrs: Francesca Battistutta e Cristian Pressacco
